60 jaar gelede het Marianette Pretorius die wêreld ingekom. Gelukkige mense ken haar en geseënde mense noem haar familie. Ten spyte van die huiskluis situasie wou ek seker maak sy weet hoe spesiaal sy is.
Sy het tee in die bed ontvang. 'n Nuwe pienk een met die woorde 'HOME SWEET HOME' op. Dit het gepas gevoel want dis naweek, dis lockdown EN sy het afgetree. Sommer alles gelyk.
Almal was so besig om toiletpapier en seep te koop dat ek in vrede kon soek vir oulike versierings. Ek het gemik vir pienk, blink en blomme. Dit was nie eintlik nodig om veel te koop nie. Nana het baie pienk en blink.
Die eetkamer was vol linte, kristalletjies, blomme, sambreeltjies en daai walglike vislyn goed. Haar reaksie was die moeite en vloeksels werd. Sy het die trappe afgekom, uitgetooi in 'n kroon en 'n birthday-sash.
Al wat sy kon uitkry is "wooooooooow" terwyl sy heen een weer al die pienk, blink en blomgoed inneem. Die perskonferensie het goed gegaan op Facebook. Sy het die massas aangespreek met 'n glasie Franse sjampagne en 'n heildronk van formaat.
Na 'n smaaklike ontbyt braai het ons gesit om geskenke oop te maak. Met 'n massiewe glimlag was dit tyd om te rus. Ons het moontlik te veel geëet...
My ouma het natuurlik 'n verjaarsdagkoek gebak wat my ma altyd sal onthou; 'n pienk olifant met 'n 6 en 'n 0 in sy oortjies. Sy het so 'n gilletjie laat ontsnap voor die volgende oproep deurgekom het. Dit lyk my mense is lief vir haar, slim mense!
Ons aand het begin met 'n Charl du Plessis huiskonsert soos wat ons van koek en tee oorgeslaan het na Gin and T cause she's 60.
Geen aantal versierings of geskenke sal ooit kan genoeg wees om te wys hoe belangrik sy vir ons is nie.
Al my liefde
No comments:
Post a Comment