Huiskluis Dag 28

Ek was by Spar. In die ou dae, toe ons nog buite kon wees vir iets anders as kos, sanitizer of toiletpapier, was dinge anders.

Die rakke was anders. As ek kruie en speserye wou hê, kon ek net by die rytjie afstap en dit kry. Robertson Spices was nog altyd daar vir my. Nou is hulle daar vir almal. Vandat mense so baie tyd by die huis spandeer, het hulle besluit nou is die tyd. Nou moet hulle gekompliseerde resepte wat 4 jaar terug op Facebook gedeel is, toets.

Daar is kinders wat sekerlik vir die eerste keer kruie en speserye in hulle kos het. Van hulle is dalk verstom om te sien dat hulle ouers meer as 5 disse kan kook. Dit is al wat sal verduidelik hoekom my Robertsonrak leeg is en moenie dat ek begin teem oor die Knorr Chicken Noodle sop nie. Dit is so skaars soos drank (vir mense wat nie in my huis bly nie. Sorry né). Ek voel benadeel.

Ons weet nou al die mamma's is besig om alles te bak, want daai rakke is ook omtrent so leeg soos 'n restaurant. Ek was laasweek opsoek na vanilla essence. Niks. Daar was amandel, suurlemoen, pynappel en lemoen. Hierdie week is net die lemoen oor. Dit beteken daar is mense wat goed bak wat proe soos kunsmatige pynappel. Nie so erg soos eiers sluk nie, maar hoekom voel dit soos 'n kompetisie?

Ek moes ook swartsakke en superglue kry, want sedert my ma afgetree het, pak sy stuk-stuk alles reg en maak skoon. Al die goedkoop swartsakke is uitverkoop. Daar is net van daai duur sakke met die drawstrings oor en ek vat maar 'n pakkie. Wie nog is besig om reg te pak? Wil julle 'n ondersteuningsgroep stig?

Vir haar kombuis om volmaak te wees moet sy die yskasmagnete plak wat die inwoners van die huishouding so afslinger, afloop en afstamp. Ek kom by die "general merchandise" ry en ek bekyk die rakke so. I kid you not, nie een superglue nie. Plak al die ander mense ook hulle magnete?

Ek was by Spar en ek wens die ander mense met hulle geurige kos, vanilla cupcakes, cheap swartsakke en flippen geplakte magnete was nie daar nie.